शेतकरी नवरा

____शेतकरी नवरा___

शेतकऱ्याची मी लेक

मला दिलंय डांगणात

नवरा मिळाला शेतकरी

रोज राबते शेतात

रोज सकाळी उठून

गोठा गुरांचा झाडीते

मोठी कसांडी भरून

रोज दूध मी काढीते

लांब पाणवठा पाण्याचा

दुडी हांड्यांची डोईवर

कळशी पाण्याची कमरेला

रोज चालते कोसभर

डोई भाकरीची पाटी

घेऊन जाते मी शेतात

गार झाडाच्या सावलीत

बसून खातो आनंदात

आखा दिवस आमचा

जातो चिखल मातीत

घरधण्याच्या सांगतीनं

भात लावते आवणात

आवणी,सोंगणी करिते

पात बैलांची धरिते

भात मळून झाल्यावर

रास खळ्यात लागते

माझा सोन्याचा संसार

आहे सर्वांचा आधार

मला आहेत सारखेच

माझं सासर,माहेर

अभिमानाने सांगते मी

माझा नवरा शेतकरी

जीवापाड प्रेम त्याचं

आहे लाखात लय भारी

        सिताराम कांबळे

गारवाडी,ता.आकोले,जि. अ. नगर