कटू सत्य

___कटू सत्य___

बाप राबतो शेतात

पोरं हिंडती गावात

नाही धरला त्यांनी

कधी कासरा हातात

उभ्या आयुष्यात नाही

तुटकी वहान भेटली

काम करता करता

जुनी बंडीही फाटली

त्याची पोरं लाडकी

गाडी घेऊन फिरती

वरून पेट्रोलचा खर्च

आई बापाकं मागती

बाप म्हणे माझी पोरं

त्यांचा मलाच आधार

त्यांना शाळा शिकवून

करील वकील,डॉक्टर

पोरं शिकेनात शाळा

शिकू लागल्या पोरीसोरी

चांगल्या शिकून सवरून

झाल्या मोठ्या अधिकारी

म्हणे वंशाचा दिवा

आजूबाजूला अंधार

लेक लावी खूप जीव

तिचा सांभाळून संसार

         सिताराम कांबळे

गारवाडी               अकोले