ती-लवकर उठून शेतात जाता
उपाशी पोटी औत हाकता
आहो कारभारी या लवकर जेवायला
कांदा भाकर मी आणली खायाला
तो-थांब थोडा वेळ येतो मी जेवायला
आधी बैलांना नेतो पाणी पाजायला
तो-बैल सावलीत बांधतो
त्यांना वैरण घालतो
त्यांच्याच जीवावरती
आपण शेती ही करतो
वाढ लवकर येतो मी जेवायला
परत जाईल मी औत धरायला
ती-आहो कारभारी या लवकर जेवायला
चटणी भाकर मी आणली खायाला
ती-तुम्ही रोजच असंच म्हणता
काम करून उपाशी मरता
आपल्या शेतात राबून
पोट दुनियेच भरता
घाम रोजच लागतोय गळायला
आहो कारभारी आता या ना जेवायला
तो-वाढ लवकर येतो मी जेवायला
परत जाईल मी औत धरायला
ती-आता उशीर नका लावू
या लवकर जेवून घेऊ
काम लवकर उरकून
आज संगतीच घरी जाऊ
दिवस लागलाय आता ढळायला
आहो कारभारी आता या ना जेवायला
तो-गाय बैल आपलं धन
आपण ठेऊ या जपुन
कमी असली आपली शेती
तरी करू या आनंदानं
नेतो बैल रोज रानात चारायला
वाढ लवकर येतो मी जेवायला
ती-आहो कारभार या लवकर जेवायला
कांदा भाकर मी आणली खायाला
Comments
Post a Comment