सोनं

 _____सोनं_____

पडू लागला पाऊस

बळीराजा खुश झाला

बैल जोडीला घेऊन

शेताकडे तो निघाला

चालू केली नांगरणी

धरुन नांगर हातात

मग करून चिखल

भात लावलं शेतात

शेत नींदुन काढलं

पीक वाढलं जोमानं

आज भाताच्या रूपानं

सोनं दिलंय देवानं

आलं पीक कापायला

दिसू लागलं ते सोनं

पाहून त्या पिकाकडे

मन झालं हो प्रसन्न

धार लावून विळ्याला

चालू केली येटाळणी

भारा बांधून भाताचा

गेला खळ्यात घेउनी

पात बैलांची धरून

भात घेतलं मळून

गोण्या भरून सोन्याच्या

गेला घराला घेऊन

     सिताराम कांबळे

गारवाडी,अकोले,अ.नगर